Sipas informacioneve të marra nga Ministria e Shëndetësisë gjatë 2024, janë nxjerrë dy vendime të veçanta për invalidët e luftës së UÇK-së dhe invalidët civilë të luftës, të cilat përcaktojnë mundësinë e mbulimit financiar për protezat.
Deputeti i PDK-së, Mergim Lushtaku, ka mbështetur amendamentin duke theksuar se veteranët e UÇK-së vazhdojnë të paraqesin ankesa për mbulimin e shpenzimeve të protezave. Deputetja e Aleancës, Teuta Haxhiu, ka vlerësuar amendamentin si i nevojshëm, duke shtuar se veteranët përballen me vështirësi në sigurimin e protezave dhe shpesh mbështeten në ndihmën e miqve dhe bashkatdhetarëve në diasporë.
Deputeti i LDK-së, Avdullah Hoti, ka shprehur përkrahjen e tij për amendamentin, por ka argumentuar se çështja duhet zgjidhur në mënyrë të përhershme duke përfshirë shpenzimet për protezat në buxhetin e rregullt të Klinikës së Ortopedisë në QKUK.
